Ustoz deb tanilgan odamlar o’z ishi bilan ko’proq band bo’ladi. Faoliyati bir xil tusga aylanib qoladi. Komfort zonada, boshqalar e’zozida, monoton hayot kechirishni boshlaydi.

Bu holat ayniqsa tibbiyotda ko’p uchraydi. Bir shifokor o’z sohasini o’sha paytdagi yaxshi mutaxassisi bo’ladi. Mijozlari ko’payadi. Atrofiga bilim chanqog’i yuqorilar to’planishni boshlaydi. Uni ustoz deya e’zozlashni boshlashadi.

U shifokor komfort zonaga o’zi bilmagan holda moslashib qoladi. Avvalgidek bilimga chanqoq emas u endi. Har kuni ko’p uchraydigan kasalliklar bilangina ishlaydi. Kam uchraydigan kasallik turlari yodidan chiqadi. Yangicha davolashdan ko’ra o’zi o’rgangan davo usullarini qo’llashni afzal ko’ra boshlaydi. Bemor ko’rishni kitob o’qishdan ustun qo’yadi. Chunki har bir bemor moliyaviy stimul beradi.

Oradan yillar o’tadi. Bilimlar eskiradi. Atrofdagilar esa uni ustoz deya e’zozlashda davom etishadi.

Ustozlarni tanqid qilish kerak. Ular qarorlariga tanqidiy yondashish zarur. Tanqid bu hurmatsizlik emas. Agar tanqid qilish uchun fikr yetarli bo’lmasa, savol berish kerak.

Shogirdni eng katta xatosi o’z ustozini hamma narsani biladi deb hisoblashi. Ustozim qilganini qilaman deya tanqidiy yondashuvni chetga surib qo’yishi. Ustoz deya tan oladigan aksar insonlarimiz bilimlari eskirgan. Buni yodda tutish muhim.

Ustozlarni tanqid qilish ularni komfort zonadan chiqishiga turtki bo’lishi mumkin. Shu bilan birga sizga ketga tepki bo’lishi ehtimoli yo’q emas 😁 Shunday bo’lsada harakat qilib ko’rishga arziydigan risk. Indamay turishdan ko’ra biror foydali narsani o’rganishga imkon beradi.

Professional va havaskor orasidagi farqlarni o’qiganimda quyidagi fikrlar bor edi.

Professional o’zini bilmasligini tushunib yetgan inson. Havaskor esa o’zini bilimli hisoblaydi.

Professional komfort zona havfini tushunib yetgan, havaskor esa uni himoya qiladi.

Professional o’zidagi bor bilimni berishga intiladi, havaskor esa uni qizg’anadi.

Professional doim tanqid qidiradi, havaskor tanqidni yomon ko’radi.

Agar sizning ustozingiz tanqidingizni yomon ko’rsa, siz professional ustoz topishingiz kerak.

Bek Olimjon
28.03.23
Norvegiya