Kecha bir ish bilan Latviyaga, Rigaga keldim.

Latviyada potensial juda yuqori. Dunyo o’rtasida joylashgan, katta portlardan biriga ega. Dengiz va okeanga to’g’ri chiqa oladi.

Kecha shahar markazidan chetga 2-3 marta chiqishga to’g’ri keldi. Har safar Rigaga kelganimda negadir meni tushkunroq kayfiyat qamrab oladi. Sababi hamma joy kulrang, graffiti chizilgan, nurab tushayotgan sovet binolari, e’tibor berilmagan yo’llar va aholi uchun qimmat narhlar.

Lekin Eng achinarli jihati jamiyatda yoshlardan ko’ra yoshi kattalarni ko’proq uchratasiz. Bu jamiyat kelajagi uchun yaxshi belgi emas. Bu jamiyat yoshlarida yevroittifoq pasporti bo’lgani va til bilgani uchun yaxshiroq iqtisod va kelajak uchun Skandinaviya davlatlari, Germaniya va Buyuk Britaniya kabi davlatlarga ko’p ketishadi. Ko’p joyda AQShga ketish bo’yicha reklamarni ko’rasiz. Yoshlar ketib qolayotgani yaqqol ko’rinadi.

Taksiga chiqdim. O’zbek ekanligimni aytsam, taksist hursand bo’lib, O’zbekistonga borgan paytidagi xotiralarini esladi, lag’mon yegani, uzum va qovun shirinligini aytdi, odamlari muloyim va mehmondo’st ekanini aytdi. Aytib berishicha sobiq sovetni dzyudo bo’yicha terma jamoasini 8 yil davomida murabbiysi bo’lgan ekan. Shunday buyuk imperiya terma jamoasi murabbiysi, zyudochilarni olimpiadalarga olib borgan odam ekan. Nafaqada bo’lsada hali ham murabbiylik qilar ekan. Pul topish uchun taksi haydar ekan.

Ko’p tajribaga ega bo’lgan mutaxassislarini qadrlamagan, yoshlar rivojlanishi, oila qurishi va jamiyatga xizmat qilishi uchun sharoit bo’lmagan jamiyat inqiroz yoqasida qoladi. Bu esa o’z navbatida iqtisodiy va siyosiy qaramlikka sabab bo’ladi.

Latviyada juda ko’plab o’zbek talabalari bor. Afsusli jihati ularning aksar qismi bu yerdagi vaqt va imkoniyatini qisqa muddatda pul topishga qaratishadi. Ovqat tashish xizmatlarida ishlashadi. Qaniydi, shu yerdagi imkoniyatni bilim olishga, ko’nikma orttirishga va Yevropa mutaxassislar mehnat bozoriga kirishga harakat qilishganida edi, uzoq muddatli investitsiya bo’lar edi.

Bek Olimjon
05.03.2023, Riga