Hozirgacha olgan tajribalarimni, fikr va xulosalarimni ijtimoiy tarmoqlarda imkon qadar bo’lishib boraman.

Nasib qilgan ekan bir nechta yoshlar ergashishmoqda. Qandaydir manfaat olmoqda. Bu darajaga yetkazganiga shukur.

Shu o’rinda ko’pchilik menga ustoz deya murojaat qilishadi. Men ustoz emasman. Shunchaki fikrlarimni ulashib boryabman xolos. U firklarni ma’qullagandan, qarsak emoji qo’ygandan na sizga, na menga foyda bor. Undan ko’ra qarshi fikr bildirsangiz, tanqid qilsangiz sizdan ko’proq mamnun bo’laman. Meni ustoz demang, tengdoshingizdek murojaat qilavering!

Kimnidir ustoz deb bilishning xavfli tomonlaridan xabardor bo’lishimiz muhim. Ayniqsa tibbiyot sohasida. Ustoz deb bilsak, uni ko’p bilimga ega deb bilamiz. Bu xavfli. Kimnidir bilimli deb, unga tahlil-tanqid qilmay ergashish bizni «ko’r murid»ga aylanishimizga sabab bo’ladi.

Tafakkur va tanqid qilishimiz muhim.

Men ustoz emasman. Shunchaki fikrlarimni ulashyappan xolos. Fikrlarimga qarshi fikr bildirishingizni sizdan iltimos qilaman.

Meni tanqid qiling. Konstruktiv tanqid so’ramayman. Bilganingizcha tanqid qiling. Tanqid qilishingiz uchun mendan ko’proq yutuqqa erishgan bo’lishingiz shart emas. Fikrli shaxs sifatida Siz tanqid qilishga qodirsiz.

Qarshi fikr bildiring. Tanqidingiz sizni va meni tafakkur qilishga majburlaydi. Buni esa foydasi katta.

Bek Olimjon
28.02.23
Trondheim